Wednesday, March 14, 2012

بيز و كورد حره‌كه‌تينده اوچ سورون

مئهران باهارلي

٢٠١٢

http://kurd-yayilmasi.blogspot.com/

كورد خالقي توركييه و بؤلگه‌ده اؤز ميللي حاقلاري اوغروندا اوزون و چتين و عئيني آندا حاقلي بير ساواشيم وئرمه‌كده‌دير. توركييه جومهورييه‌تينين ده گئچميشده كورد كيملييينه قارشي تاخينديغي توتوم، سون كرته (دره‌جه) يانليش ايدي. بو توتوم ايندي اولوملو يؤنده ده‌ييشمه‌كده‌دير. بو باغلامدا بؤلگه اؤلكه‌له‌رينده كورد كيملييينين توغرالي (رسمي) اولاراق قبول ائديلمه‌سي، كوردجه‌نين كوردله‌رين ياشاديقلاري بؤلگه‌له‌رده توغرالي و ائييتيم ديلي ائعلان ائديلمه‌سي و بو بؤلگه‌له‌رده كوردله‌رين اؤزله‌ريني يؤنه‌تمه‌سي كيمي حاقلار، اينسان حاقلاري قيسقيسيندادير (چئرچيوه‌سينده‌دير).

آنجاق بو گرچه‌كله‌ر، كورد ترپه‌نيمينده (حره‌كه‌تينده) كؤك سالميش اوچ آشيريليغي يعني كورد تئروريسمي، كورد ياييلماچيليغي و كورد شووئنيزميني حاقلي قيلماز.

آ-كورد تئروريزمي: كورد تئروريزمي آيريجا اله آلينماسي گرهكهن قارماشيق بير سوروندور. اؤزه‌تله:

١-گونئي آزه‌ربايجاندا تورك خالقي صفه‌ويله‌ر دؤنه مينده‌ن باشلاياراق سوره‌كلي كورد طايفا و چئته‌له‌ري طره‌فينده‌ن توپلو قيييم و قيرقينلارا اوغراميشدير. شئيخ عوبئيدوللاه`ين اورتايا چيخماسينا ده‌ك بو قييملار، بير سيرا باشي پوزوق ايلكه‌ل و آجيماسيز كورد طايفا-چئته‌له‌رينين تورك شهه‌ر و كندله‌ريني تالان و چاپاوول ائتمه و بورالاردا ياشايان توركله‌ري توپلوجا اؤلدورمه و قيرما بيچيمينده ايدي. شئيخ عوبئيدوللاه`ين اورتايا چيخيشي ايله بو باشي پوزوق كورد چئته و طايفالارينين تورك خالقينا سيلاحلي سالديرما و تورك خالقيني قيرمالاري كورد ميلله‌تچيليك بويوتونو دا قازانميش اولدو. مودئرن كوردوستان دئموكرات پارتيسي، كومئلئه و اؤزه‌لليكه پ.ك.ك و پئژاك`ين اورتايا چيخيشيندان سونرا ايسه بو سيلاحلي ائيله‌م و سالديري-آخينلار، ياواش ياواش و آرتان بير بيچيمده اؤزونه تئرور رنگي و اؤزه‌لليييني ده آلدي.

٢-كورد سيلاحلي قوروپلارينين اؤز ائيله‌مله‌ريني كوردوستاندا دئييل ده، گونئي آزه‌ربايجاندا و يا تورك-كورد خالقلارينين ياناشي و بيرگه ياشاديقلاري تورپاقلاردا ياپماسي، بيلينجلي بير سئچيمدير. كورد قوروپلارينين بو سئچيمي ياپماقدان نئچه آماجي واردير:

٣-كوردله‌رين آزه‌ربايجاندا ياپديقلاري سيلاحلي و تئرور ائيله‌مله‌ري، و اورادا قوردوقلاري گئنيش قاچاقچيليق شبه‌كه‌سي (اينسان، سيلاح، ناركوتيك مادده‌له‌ر) تورك و آزه‌ربايجان بؤلگه‌سينين ميليتاريزه ائديلمه‌سينه و بورالاردا سوره‌كلي ساواش دورومو ايله ييخيم-اؤلوم هاواسي يارانماسينا؛ ايقتيصادي، كولتوره‌ل و سيياسي گليشمه‌نين دورماسينا؛ اينسان حاقلارينين ايران دئوله‌تي طره‌فينده‌ن داها دا آغير بيچێمده و گوبودجا پوزولماسينا و تك كلمه‌ده آزه‌ربايجان`ين هر آچيدان گئريله‌مه‌سينه نده‌ن اولموش و اولماقدادير. بونون سونوجو ايسه سون يوز ايلده گؤروندويو كيمي، توركله‌رين سوره‌كلي اولاراق بؤلگه‌ده‌ن كؤچ و قاچيشي، او بير طره‌فده‌ن كوردله‌رين بؤلگه‌يه دورماق بيلمه‌يه‌ن كؤچ و گيريشيدير. باشقا بير دئييشله كورد سيلاحلي و تئروريست قوروپلاري آزه‌ربايجاندا ياپديقلاري ائيله‌مله‌رده‌ن بؤلگه‌نين ائتنيك دئموقرافيسيني اؤز خئييرله‌رينه ده‌ييشديرمه‌ك اوچون يارارلانيرلار.

٤-بو بؤلگه‌له‌رده ياشايان و هئچ بير شكيلده سيلاحلي اولمايان سيرادان و ساوونماسيز تورك كوتله‌سي، كورد سيلاحلي سالديري و قيرقين تهديدله‌ري قارشيسيندا اؤزونو قوروماق اوچون، ايسته‌ر ايسته‌مه‌ز ايران دئوله‌تينه سيغينير و اونونلا اؤزده‌شله‌شير. بو دا بير ياندان دينچي-شيعي فاناتيزمينين تورك خالقيندا بليرگينله‌شيپ درينله‌شمه‌سينه، دولاييسييلا تورك خالقينين داها دا گئريله‌مه‌سينه‌ نده‌ن اولور، بير ياندان دا تورك ميللي بيلينجينين اورتايا چيخماسيني انگه‌ل.له‌يير. بو دوروم، ايران دئوله‌تينه ياراديغي كيمي، كورد ميلله‌تچيله‌رينين ده ايسته‌ديكله‌ري بير دورومدور. چونكو كولتوره‌ل اولاراق گئري قالميش، ميللي بيلينجده‌ن يوخسون، ديني فاناتيزمه جوموپ باتميش، ايرانليلاشان، اؤز ميللي حاقلاريني آنلامايان و قوروماقدان عاجيز اولان قونشو بير تورك كيتله‌سينين الينده‌ن هر شئيي، ان باشدا توپراق و وطه‌ني قولايجا آلينابيله‌ر.

٥-تورك ساوونماسيز كيتله‌له‌رينين كورد سيلاحلي موجاديله‌سي-تئرورو- تالان و قريقينلاري ايله كورد قاچاق شبه‌كه‌له‌ري قورخوسوندان ايران دئوله‌تينه ياناشماسي، كورد قوروپلاري طره‌فينده‌ن تورك خالقينا قارشي قارالاما و پيسيكولوژيك ساواش آراجي اولاراق قوللانيلير. بو دوغرولتودا كورد قوروپلار اؤز پيروپاقاندالاريندا تورك خالقيني ايران دئوله‌تي ايله كوردله‌ري ازمه‌كده ايش بيرلييي ائده‌ن طره‌ف اولاراق گؤسته‌رير. بو دا دونيا قامو اويو اؤنونده مظلوم كوردله‌رين ظاليم توركله‌رده‌ن توپراق ايسته‌مه‌سينين داها حاقلي گؤرونمه‌سينه نده‌ن اولور.

ب-كورد ياييلماچيليغي: تورك خالقي و تورك توپراقلاري، كورد ياييلماجيليغي ايله ده تهديد ائديلير:

١-بير چوخ كورد قوروپو كورد نوفوسونون آرتماسي ايله كوردوستان سينيرلاري گنيشله‌مه‌سينين عئيني آنلاما گلديييني دوشونور و يا بئله دوشونمه‌ك ايسته‌يير. داها دوغروسو، آرتان كورد نوفوسونون ياشاديغي بؤلگه‌له‌رين گنيشله‌مه‌ سوره‌جينده‌ن يارارلاناراق، سوره‌كلي اولاراق كوردوستان سينيرلاريني گنيشله‌تمه‌ني آماجلايير. باشقا بير دئييشله بو كيمي كورد قوروپلارين كوردوستاني، سينيرلاري بللي اولمايان، زامانلا گئنيشله‌يه‌ن، سه‌ييال و سه‌ييار بير اؤلكه‌دير. بو سيياسه‌ت ايسراييلˊين يهودي يئرله‌شيمله‌ريني گنيشله‌تمه سيياسه‌تينه بنزه‌يير.

٢-بير سيرا كورد قوروپلارين ياييلماجي آنلايش و اويقولاماسي، تكجه گونئي آزه‌ربايجانين باتي بؤلگه‌له‌ريني تهديد ائتمير. بو ياييلماجيليق سيياسه‌تي توركييهˊده (اييدير، قارس، آرداهان، ....) اولدوغو كيمي؛ عيراق (كركوك و چئوره‌سي)، آزه‌ربايجان جومهورييه‌تي (لاچين، ناخجيوان و چئوره‌سي)، سورييه (قاميشلي، باييربوجاق و چئوره‌سي)، خوراسان (بوجنورد، قوچان، .....) و اؤزه‌لليكله گونئي آزه‌ربايجانˊدا ماكيˊدان خوي، سالماس، اورمو، سولدوز، سايين قالا، تيكان تپه و اورادان اسه‌دآباد، قوروا، بيجار، ياسوكن، سونقور`ا ده‌ك ياشايان توركله‌رين اؤزله‌ري و ياشاديقلاري تورك تورپاقلاريني جيددي بيچيمده تهديد ائتمه‌كده‌دير.

٣-بير سيرا ايرانلي و يا ايرانلي اولمايان ياييلماجي كورد قوروپلاري، اوزون بير سوره‌دير كي ايران، بؤلگه و دونيادا يايديقلاري خريطه‌له‌رده، غربي آزه‌ربايجان، كوردوستان و كيرمانشاه اوستانلارينين كورد بؤلگه‌له‌رينه اك اولاراق؛ غربي آزه‌ربايجانين تورك بؤلگه‌له‌ري ايله شرقي آزه‌ربايجان، زنگان، همه‌دان و سون دؤنه‌مله رده پهله‌وي و ايسلامي جومهورييه‌تي ايلله‌رينده قونشو اوستانلاردان قوپارديلاراق يئنيجه اولوشدورولان كوردوستان و كيرمانشاه اوستانلارينا ايلحاق ائديله‌ن تورك و آزه‌ربايجان توپراقلاريني دا داخيل ائديرله‌ر و بوتون بو تورك آزه‌ربايجان توپراقلاريني يالاندان كوردوستان آدلانديريلار. بو بؤلگه توركله‌رينين ساييسيز ائعتيراضلارينا قارشين، ايندييه دك تك بير كورد قوروپ بيله، بو اويدورما، تهديد ائديجي و ساواش قيشقيرتان خريطه‌له‌رين حاضيرلانيپ يايينلاماسي اوچون راحاتسيز و يا اوزگون اولدوغونو بيلديرمه‌ميشدير.

٤-كورد قوروپلاري اؤز سيلاحلي و تئروريست ائيله‌مله‌ريني گنه‌لده آزه‌ربايجان توپراقلاريندا ياپير و ايران دئوله‌تي طره‌فينده‌ن ياخالانانلار دا گنه‌لده بو بؤلگه‌له‌رين محكمه‌له‌رينده يارقيلانيپ جزالانديريلير. بو اولايلارين خبه‌ري ايسه اؤزه‌لليكله ديش مئدييادا يايينلاناندا، آزه‌ربايجانين بو بؤلگه‌له‌رينين اصلينده كوردوستان توپراقلاري اولدوغو هاواسيني يارادير. نه ده اولسا كورد قوروپلارينين ائيله‌مله‌ري بورادا ياپيلير، محكه‌مه‌له‌ر بورادا قورولور و جزالار دا بورادا وئريلير. دولاييسي ايله هر شئي بورالارين كوردوستان اولدوغونو گؤسته‌رير. كورد قوروپلاري ايران دئوله‌تي ايله ياپديقلاري سيلاحلي ساواشين آزه‌ربايجانين بو بؤلگه‌له‌رينده جره‌يان ائتمه‌سينده‌ن، بورالارين كوردوستان اولدوغو گئرچه‌ك ديشي ايماژ و فيكريني يايماق اوچون ائتگيلي بيچيمده يارارلانيرلار.

٥-شئيخ عوبئيدوللاه، ايسماعيل آقا سيميتقو و بنزه‌له‌رينين آدلاري، تورك خالقيندا قيرقين، سالديري، توپلو قيييم و قان ايله اؤلومو چاغريشديران آدلاردير. آنجاق بو آدلار كورد سيياسي اده‌بيياتيندا ميللي قهره‌مان كيمي گؤسته‌ريلير. ايندييه دك تك بير كورد قوروپ و شخصييه‌ت بو كيمي اشقييانين تورك خالقينا ياپديغي اينسانليق ديشي ظولوم و آجيماسيزليقلاريندان عؤذور ايسته‌مه‌ميشدير. بو ايسه تورك خالقيندا كورد قوروپلارا قارشي درين بير گووه‌نسيزليك حيسسينين يارانماسينا نده‌ن اولموشدور. چونكو تورك خالقينا گؤره آدي گئچه‌نله‌ري قهره‌مان گؤسته‌رمه‌كله كورد شخصييه‌ت و قوروپلارجا تورك خالقينا وئريله‌ن آچيق بير مئساژ واردير: تورك خالقي وطه‌نيني ترك ائتمه‌زسه، گينه ده و ايلك فورصه‌تده بنزه‌ر كورد قهره‌مانلاري طره‌فينده‌ن عئيني عاقيبه‌ته دوچار اولاجاقدير.

٦-دئموكرات پارتيسينين ايسلامي اينقيلابين ايلك ايلينده ياپديغي قيشقيرتمالار و تورك خالقينا قارشي گيريشدييي توپلو قيييملاردان دولايي ايندييه دك تورك خالقيندان عؤذور ايسته‌مه‌مه‌سي، ترسينه قيييم و قيريما اوغرايان تورك خالقيني بوتون دونيادا (دئموكرات پارتيسينين آزه‌ربايجانين سولدوزوندا تورك خالقينين قتل-ي عامييلا باشلاتديغي و ايران ايسلام جومهورييه‌تينين قارنا فاجيعه‌سي ايله بيتيردييي) او اجي اولايلاردان دولايي سوچلو گؤسته‌رمه‌سي ده تورك خالقينا وئريله‌ن بير گؤز داغيدير. دئموكرات پارتيسينين بو قونودا منيمسه‌دييي توتومون آنلامي بودور: او قيشقيرتما و قييينلار حاقلي ايدي و گينه ده ياپيلاجاقدير. آماج، تورك خالقيني قورخوداراق اؤز وطه‌نيني بيراخيپ قاچماغا و ايران دئوله‌تينين قوجاغينا دوشمه‌يه زورلاماقدير.

ج-كورد شووئنيسمي: كورد ميللي موجاديله‌سي يئيينليكله شووئنيسمله اؤزده‌شله‌شمه‌يه دوغرو گئدير. بونون اؤرنه‌كله‌ري چوخدور:

١-غربي آزه‌ربايجان، همه‌دان، كوردوستان و كيرمانشاه (هرده‌ن شرقي آزه‌ربايجان ايله زنگان) اوستانلاريندا يئرله‌شه‌ن توركله‌رله مسكون آزه‌ربايجان شهه‌ر، قصه‌به و كندله‌ريني- كي بونلارين بعضيسينده كوردله‌رين يوزده‌سي تك‌ رقه‌مليدير و يا اصله‌ن كورد نوفوسلاري بيله يوخدور- بؤيوك كوردوستان يئركيپله‌رينه (خريطه‌له‌رينه) داخيل ائتمه‌ك و بو گرچه‌ك ديشي يئركيپله‌ري ايصرارلا دونيادا يايماق

٢-زورلا كورد اولمايان زازا؛ و ايراندا گوران، لك، فئيلي و لور كيمي ايرانيل (ايرانيك) خالقلاري كورد گؤسته‌رمه‌ك

٣-گونئي آزه‌ربايجان`ين عله‌وي قيزيلباش توركله‌ريني، اولماديقلاري حالدا، كورد اهل-ي حاق، يارئسان اينانجيندا و سونني توركله‌ريني (كوره‌سوننوله‌ري) كورد گؤسته‌رمه‌ك

٤-توركله‌رله مسكون تورپاقلارا كورد تاريخي اويدورماق

٥-كيرمانشاه و كوردوستان اوستانلاريندا قالان تورك توپراقلارينين آزه‌ربايجانلي اولدوقلاريني، بورالارين آزه‌ربايجان اوستانلارينا ايلحاق ائديلمه‌له‌ري و يا كوردوستان-كيرمانشاهدان آيريليپ يئني بير اوستان (آزربايجان افشار-آفشار آزه‌ربايجاني) اولماسي گره‌كدييني دانماق

٦- كيرمانشاه و كوردوستان اوستانلاريندا ياشايان تورك خالقينين وارليغيني گؤرمه‌زده‌ن گلمه‌ك و بونلارين بوتون ميللي حاقلاريني دانماق

٧-تورك طايفالاريني (افشار، ...) كورد گؤسته‌رمه‌ك

٨-تورك شخصييه‌تله‌ريني (گئچميشده‌ن حسام الدين چلبي، صفي الدين اورمه‌وي،...؛ اينديكيله‌رده‌ن حاج قوربان سولئيماني، ....) كورد گؤسته‌رمه‌ك

٩-تورك تاريخي ميراثيني (قوشما چالقيسيني، بيجار خاليسيني،...) كورد كؤكه‌نلي گؤسته‌رمه‌ك

١٠-كورد سيياسي قوروپلار و شخصييه‌تله‌رينين پان ايرانيستله‌ر و ايران دئوله‌تينين تورك خالقيني دانما و يوخ ائتمه‌يه يؤنه‌ليك عيرقچي و سؤمورگه‌چي سيياسه‌تله‌ري دوغرولتوسوندا تورك خالقيني آذري آدلانديرماسي

١١-گونوموزده كوردله‌رله مسكون اولان آنجاق اسكيده‌ن توركله‌رين ياشاديغي يئرله‌رين تاريخه‌ن توركجه اولان جوغرافي آدلاريني كوردجه آدلارلا ده‌ييشديرمه‌ك (خانا-پيرانشهر، ساووجبولاق-مهاباد،....)، تورك جوغرافي آدلارا كؤردجه كؤكه‌ن اويدورماق

١٢-بؤلگه سيياسه‌تله‌رينده (خزه‌ر دنيزي، قاراباغ سورونو، ....) فارس و ائرمه‌ني ياييلماجيليق و شووئنيسمي ايله بيرليكده حره‌كه‌ت ائتمه‌ك، اؤرنه‌يين قاراباغ ساواشلاريندا كورد قوروپلاري ايشغالچي ائرمه‌ني گوجله‌ري سيرالاريندا تورك خالقينا قارشي سيلاحلي موجاديله‌يه قاتيلميشلاردير.

١٣-اولوسلارآراسي توپلانتي و تماسلاردا، آچيقجا و يا گيزلي، آنجاق سوره‌كلي اولاراق گونئي آزه‌ربايجاندا ياشايان تورك خالقينا قارشي منفي تبليغات آپارماق؛ تورك ميللي دئموكراتيك حره‌كه‌تيني عيرقچي، تورك خالقيني ايسه ايران دئوله‌تي ايله بيرليكده حره‌كه‌ت ائده‌ن خالق كيمي گؤسته‌رمه‌يه چاليشماق

١٤-توركييه دئوله‌تينين كوردله‌ره قارشي ياپديقلاريندان، ايران و گونئي آزه‌ربايجاندا ياشايان توركله‌ري سوروملو توتماق. ايراندا ياشايان تورك خالقي ايله توركييه دئوله‌تي آراسيندا كورد قوروپلاري طره‌فينده‌ن‌عينييليك ياراديلماسيندان آماج، دونيا قامو اويونون مظلوم كوردله‌رين ظاليم توركله‌رده‌ن توپراق ايسته‌مه‌سينه دسته‌ك وئرمه‌سيني ساغلاماقدير.

اؤزه‌ت و سونوج: يوخاريدا سايديغيم اوچ قونو يعني كورد تئروريسمي، ياييلماچيليغي و شووئن ميللييه‌تچيلييي، تورك خالقي و آزه‌ربايجانˊي تهديد ائتمه‌كده و بيزيم ميللي چيخارلاريميزا ترس دوشمه‌كده‌دير. كورد ميللي حره‌كه‌تي بونلارا سون وئرمه‌ديكجه، كورد-تورك و كوردوستان-آزه‌ربايجان ايليشگيسي داها دا گرگينله‌شه‌جه‌ك و بؤلگه‌نين گله‌جه‌ييني تهليكه‌لي يؤنله‌ره ساپديرابيله‌جه‌كدير. بوندان دا باشدا كورد خالقي اولماق اوزه‌ره هامي ضره‌رلي چيخاجاقدير.

0 Comments:

Post a Comment

<< Home