Thursday, March 08, 2012


آزه‌ربايجان-كوردوستان سينيرلاريني بليرله‌مه‌ده تمه‌ل آلينماسي گره‌كه‌ن ايلكه‌له‌ر

(اصول اساسي در تعيين مرزهاي آزربايجان و كردستان)

مئهران باهارلي

http://kurd-yayilmasi.blogspot.com/


آزه‌ربايجان ميللي حؤکومه‌تي`نين آزه‌ربايجان سينيرلاري حاققينداکي دوشونجه و اويقولامالاري تاريخي، ايستيراتئژيک و ميللي باخيمدان يانليش اينانج، سينچيكسيزليك (ديققه‌تسيزليك)، بيلگيسيزليك و سيياسي ضعف اوزونده‌ن اورتايا چيخميشدير. بو يانليش دوشونجه‌له‌ر تمه‌‌لينده ياپيلان آنلاشمالار ايسه تورك خالقينين ميللي چيخارلارينا ترس دوشدوكله‌رينده‌ن اؤتورو، هئچ بير شکيلده بوگون اوچون گئچه‌رلي ساييلابيلمه‌ز و تورك خالقي ايله آزه‌ربايجان`ين گله‌جه‌ييني باغلاماز. بو اؤلومجول سيياسي خطا و يانليشليق، ان باشدا آزه‌ربايجان`ين سولدوز، تيکان تپه، سايين قالا، .... بؤلگه‌له‌رينده ياشايان تورک خالقينا ايهانه‌ت ساييلير و قبول ائديلمه‌زدير.

سؤزوموز

آزه‌ربايجان و كوردوستان (و فارسيستان، گيلان، لكيستان) آراسينداكي ميللي سينيرلاري بليرله‌مه‌كده، نهايي بير چؤزومه اولاشمانين ان اؤنه‌ملي يول و يورداملاريندان بيري، فارس، گيله‌ك، كورد و لك خالقلاري ايله آپاريلان قارشيليقلي دانيشيقلاردير. آنجاق دانيشيقلار بو سورونون چؤزومونده سون آشامالاردان بيريدير، وار اولان يوللارين هاميسي دئييلدير و تك باشينا يا دا ايلك باشدا يارار ساغلاماز، حتتا ضره‌رليدير.

ايزله‌نيلمه‌سي گره‌كه‌ن تاكتيكله‌ر

١-ايلك اؤنجه بيز ميللي توپراقلاريميز و ميللي سينيرلاريميزي اوچ "ائتنودئموقرافيك" (ائتنيك آزه‌ربايجان)، "ژئوايستيراتئژيك" (سيياسي آزه‌ربايجان) و "جوغرافي- تاريخي" (تاريخي آزه‌ربايجان) اولماق اوزه‌ره و اوصوللارا داياناراق ياخشيجا بيلمه‌لي و بليرله‌مه‌ليييك.

٢-سونرا بو اوچونون تركيبينده‌ن ميللي چيخارلاريميزي ان ياخشي بيچيمده قارشيلايابيله‌ن گونئي آزه‌ربايجان`ين ميللي يئركيپيني (خريطه‌سيني) تانيملامالي و ياراتماليييق. كورد و ائرمه‌ني خالقلاري چوخداندير اؤزله‌رينه بئله بير خريطه تانيملاميشديرلار.

٣-اوچونجو آشامادا ميللي چيخارلاريميزي يانسيدان و قورويان بو سينير و خريطه‌ني، بوتون آيدينلاريميز، بيليم آداملاريميز، دونيانين آكادئميك و سيياسي مركه‌زله‌ري ايله مئدييالاري و خالقيميز آراسيندا يايماليييق. بونو ايندي كوردله‌ر ائيله‌ييرله‌ر و ائرمه‌نيله‌ر ده اون ايلله‌ر بوندان قاباق ائتميشديرله‌ر.

٤-ان سون آشامادا ايسه گله‌جه‌كده كوردله‌رله ميز داليندا اوتوراندا، دانيشيقلار، چنه وورماقلار، تهديدله‌ر، تطميعله‌ر، ديپلوماسي و باشقا سيياسي آراج و مانئورالارلا يوخاريدا بليرله‌ديييميز ميللي سينيرلاريميزا لاپ ياخين اولان سيياسي آزه‌ربايجاني الده ائتمه‌يه، بونو گونئي آزه‌ربايجان دئوله‌تي سينيرلاري ايچينه قاتمايا چاليشماقدير.

آزه‌ربايجان دئموکرات فيرقه‌سي`نين يانليش و يانيلقيلاري

گئچه‌نله‌رده آچيق نئت سايتيندا بير سيرا كورد قوروپلارين آزه‌ربايجان توپراقلاري اوزه‌رينده ائتديكله‌ري ايدديعالارلا ايلگيلي ياييلان آشاغيداکي يازي، هم زامانلاما باخيميندان يئرينده و هم ده ايچه‌ريک آچيسيندان -بير ايکي نؤکته ديشيندا- ديلده‌ملي (منطيقلي) و دوغرو تمه‌ل.له‌ر اوزه‌رينده قورولموش اويقون بير يانيتدير.

نامه سرگشاده به احزاب و سازمان های کرد ايرانی
http://kurd-yayilmasi.blogspot.com/2006/03/blog-post_114305472773271787.html

يوخاريدا دئييله‌ن بير ايکي نؤکته ايسه بونلاردان عيباره‌تدير:

يازينين ان تمه‌ل سورونو، کورد-تورک و آزه‌ربايجان-کوردوستان سينيرلاري و سرحه‌دله‌رينين بليرله‌نمه‌سينده ايزله‌نمه‌سي گره‌كه‌ن يؤنته‌مله‌رله ايلگيليدير. يازيدا بو يؤنته‌مله‌رين آزه‌ربايجان ميللي حؤکومه‌تي و کوردوستان دئوله‌تينين آرالاريندا ايزباسديقلاري (ايمضالاديقلاري) آنلاشمانين روحونونا باغلي قالماق اولدوغو يازيلير.

آ- اگه‌ر بو "روح"دان آماج، دانيشيقلار ياپماق و دييالوقسا، بو بوتونويله قبول ائديله‌بيله‌جه‌ک و هر ايکي طره‌فين چيخارينا اولان بير يؤنته‌مدير.

ب- اگه‌ر بو "روح"دان آماج، آنيلان ايکي دئوله‌ت آراسيندا ياپيلان آنلاشمالارين ايچه‌رييي ايسه، بو هئچ بير شکيلده قبول ائديله‌بيلير بير روح دئييلدير و بوتونويله تورک خالقي و آزه‌ربايجان`ين ميللي چيخارلارينا ترسدير.

آزه‌ربايجان ميللي حؤكومه‌تي و كوردوستان دئوله‌تي آراسينداكي سينيرلارلا ايلگيلي ياپيلان آنلاشمالار سورونلو آنلاشمالاردير. او آنلاشمالاردا وار اولان اساس سورون، ائتنيک و ژئوسيياسي آزه‌ربايجان يئرينه، پهله‌وي دئوله‌تينين ايستئعماري يؤنه‌تگيله‌ري (سيياسه‌تله‌ري) دوغرولتوسوندا ياراديلان قوندارما ايداري تقسيماتين اساس آلينماسيدير. آزه‌ربايجان ميللي حؤكومه‌تينين، آزه‌ربايجان`ين تورپاق بوتونلويونه ترس اولان بو يانليش ايداري تقسيماتي قبول ائتمه‌سي سونوجوندادير كي آزه‌ربايجان`ين گؤز ببه‌يي ساييلان سولدوز`ون، کوردوستان دئوله‌تينه داخيل ائديلمه‌سي كيمي تاريخي بير يانليشليق حتتا خه‌يانه‌ته تانيق اولوروق. بو قونودا آشاغيداکي ايلگيلي يازيلارا باخابيله‌رسينيز:

سلدوز ترك را جزو جمهوري كردستان كردند
http://kurd-yayilmasi.blogspot.com/2006/03/1320-1301-1320.html
راديو بي بي سي: اروميه و سلدوز مزاحم آرمان كردستان هستند
http://kurd-yayilmasi.blogspot.com/2006/03/blog-post_114330816335996702.html

آزه‌ربايجان دئموکرات فيرقه‌سي`نين صاحيب اولدوغو آزه‌ربايجان تصه‌ووورو يانليش ايدي. بو يانليش تصه‌وور آزه‌ربايجان دئموكرات فيرقه‌سي باشچيلارينين آزه‌ربايجان`ين جوغرافيياسي، تاريخي و تاريخي جوغرافيياسي ايله تورك خالقينين ژئوايستيراتئژيك چيخارلارينا يئته‌رينجه تانيش اولمامالاري و پهله‌وي ديکتاسينين قوندارما ايداري تقسيماتي ايله سووئيتله‌رين زورلامالاريني سورقولامادان و گؤزو باغلي قبول ائتمه‌له‌ري سونوجوندا اورتايا چيخميشدير. بو يانليش تصه‌وور تمه‌لينده واريلان آنلاشمالار، هئچ بير شکيلده بوگون اوچون گئچه‌رلي اولابيلمه‌ز. بو اؤلومجول سيياسي خطا و يانليشليق - ان باشدا آزه‌ربايجان`ين سولدوز، تيکان تپه، سايين قالا، .... بؤلگه‌له‌رينده ياشايان تورک خالقينا ايهانه‌تدير و قبول ائديلمه‌زدير.

آزه‌ربايجان دئموکرات فيرقه‌سي باشچيلارينين يانليش آزه‌ربايجان تصه‌وورو تكجه باتي آزه‌ربايجان`ا قيسيتلي (محدود) قالماميشدير. بو حؤكومه‌ت عئيني يانليشليغي، آزه‌ربايجان`ين ان وارسيل (زنگين) يئر آلتي ارگه‌نه‌له‌رينين (معده‌نله‌رينين) يئرله‌شدييي و آزه‌ربايجان تورپاغي اولدوقلاري حالدا، ايداري تقسيماتدا كوردوستان و كيرمانشاهان اوستانلارينا باغلانان بيجار-گروس، ياسو کن، قوروا، سونقور، .... حاققيندا دا ائتميش و بو تورپاقلارين آزه‌ربايجان اولدوغو حاققيندا هر هانسي بير سؤز، ايدديعادا بولونماميشدير.

اؤته ياندان عئيني يانليشليق آزه‌ربايجان`ين گونئي دوغوسوندا فارسيستان`ا بيتيشيك تورپاقلاريميز حاققيندا دا تكرارلانيپ و سونوجدا ميللي حؤكومه‌ت طره‌فينده‌ن آزه‌ربايجان`ين ياريسيندان چوخونو اولوشدوران تورپاقلاريميز -بوگونکو زنگان، همه‌دان، قزوين، تئهران، البورز، قوم و مرکه‌زي اوستانلاري- آزه‌ربايجان`ين ديشيندا قبول ائديله‌ره‌ك فارسيستان-مرکه‌زي دئوله‌ته بيراخيلميشدير.

باشقا بير دئييشله آزه‌ربايجان ميللي حؤکومه‌تي`نين آزه‌ربايجان سينيرلاري (سرحه‌دله‌ري) حاققينداکي دوشونجه و اويقولامالاري، تاريخي، ايستيراتئژيک و ميللي باخيملاردان يانليش اينانج، سينچيكسيزليك (ديققه‌تسيزليك)، بيلگيسيزليك و سيياسي ضعف اوزونده‌ن اورتايا چيخميشدير. بو يانليش دوشونجه‌له‌ر تمه‌‌لينده ياپيلان آنلاشمالار ايسه تورك خالقينين ميللي چيخارلارينا ترس دوشدوكله‌رينده‌ن اؤتورو، هئچ بير شکيلده بوگون اوچون گئچه‌رلي ساييلابيلمه‌ز و تورك خالقي ايله آزه‌ربايجان`ين گله‌جه‌ييني باغلاماز. بو اؤلومجول سيياسي خطا و يانليشليق، ان باشدا آزه‌ربايجان`ين سولدوز، تيکان تپه، سايين قالا، .... بؤلگه‌له‌رينده ياشايان تورک خالقينا ايهانه‌ت ساييلير و قبول ائديلمه‌زدير.

تاريخي-دئموقرافيک اوصوللار

بورادا قيسساجا فئدئرال ويا باغيميسيز آزه‌ربايجان و کوردوستان`ين ميللي سينيرلاري و دئوله‌ت سرحه‌دله‌ريني بليرله‌مه‌ده واز گئچيلمه‌ز اولان ايلكه‌له‌ر (اساسلار) سيرالانميشدير:

١- گنه‌ل ايلكه: سينيرلارين بليرله‌نمه‌سينده اساس آلينماسي گره‌كه‌ن، ياشايان خالقدير

ايران`ين قوزئي باتيسيندا بوتون تورک يئرله‌شيم بؤلگه‌له‌ري آزه‌ربايجان`ا و ايران`ين قوزئي باتيسيندا بوتون کورد يئرله‌شيم بؤلگه‌له‌ري کوردوستان`ا – آشاغيداكي قئيدله‌ر گؤز اؤنونه آليناراق- داخيل ائديلمه‌ليدير. بورايا كوردوستان، كيرمانشاه و باتي آزه‌ربايجان اوستانلاريندا سون يوز ايلده كوردله‌شه‌ن (و مركه‌زي، تئهران، قوم، همه‌دان، قزوين، البورز و ... اوستانلاريندا فارسلاشان) بوتون تورك و آزه‌ربايجان تورپاقلاري دا داخيلدير. ايلك اؤنجه بيز اؤزوموز بونا اينانمالييق.

٢- سينيرلارين چيزيلمه‌سينده تمه‌ل آليناجاق زامان كسيدي، ١٩٠٦ اؤنجه‌سيدير

بير بؤلگه‌نين تورك اولوپ اولماماسيني بليرله‌ركه‌ن اساس آليناجاق زامان کسيدي و ايلايگون (تاريخ)، اينديکي ائتنودئموقرافيک دوروم دئييل، ١٩٠٦ ايلينده‌ن قاباقکي ائتنيک وضعيييه‌تدير. ١٩٠٦ تاريخي، مشروطييه‌ت اينقيلابينين باشاريسيزليغا اوغراماسي و فارس شووئنيسمينين ايران دئوله‌تي و بوروکراسيسينه حاکيم اولدوغو تاريخدير. بو تاريخده‌ن سونرا ميللي- ائتنيک بؤلگه‌له‌رين ترکيبينده گرچه‌کله‌شه‌ن بوتون ده‌ييشيکليكله‌ر (تورکييه و ايران`ين باشقا بؤلگه‌له‌رينده‌ن آزه‌ربايجان`ا گليپ بورايا يئرله‌شديريله‌ن کؤچه‌ري کورد طايفالاري؛ بؤيوک شهه‌رله‌ر،... اورمو و بنزه‌رله‌رينه ياپيلان کورد کؤچ و آخينلاري سونوجوندا بورالاردا كوردله‌رين ساييسينين آرتماسي؛ كوردله‌رين لهينه اورتايا چيخان دئموقرافيك ده‌ييشيكليكله‌ر و....)، بيره‌ر کولونييال ده‌ييشيکليک اولوپ، هئچ واخت ميللي- ائتنيک بؤلگه‌له‌ر و فئدئرال دئوله‌تله‌رين سرحه‌دله‌ريني بليرله‌مه‌ده (تعيين ائتمه‌ده) اساس آلينابيلمه‌ز. بو كوردله‌رين بورالاردا ياشاماسي، بورالارين كوردوستان اولدوغو آنلامينا گلمه‌ز، بلكه بونلار تكجه آزه‌ربايجان تورپاقلاريندا ياشايان كوردله‌رديرله‌ر.

آزه‌ربايجان تورپاقلاريندا ١٩٠٦دان سونرا اولوشموش هر هانسي بير کورد يئرله‌شيم بؤلگه‌سي- شهه‌ر يا دا کند فرق ائتمه‌ز- بوگون يوزده يوز کورد اولسا بيله، گينه آزه‌ربايجانا داخيل ائديلمه‌ليدير. عراق`دا كورد اؤنده‌رله‌ر بارزاني و طاليباني، کورد بؤلگه‌سي و اؤزه‌لليكله (خوصوصه‌ن) كورد بؤلگه‌سينين ديشيندا قالان، توركمان شهه‌ري اولان کرکوک`ون ايستاتوسونو بليرله‌مه‌ک اوچون، بعث رئژيمين قورولماسيندان قاباقکي وضعيييه‌تين اساس آلينماسيني، بو تاريخده‌ن سونرا بؤلگه‌يه کوچ ائده‌ن و يا يئرله‌شديريله‌ن عره‌بله‌رين بيله، بو تورپاقلاردان ديشارييا آتيلماسيني مودافيعه ائديرله‌ر. بيز ده بو تجروبه‌ده‌ن درس آلاراق، آزه‌ربايجانا ١٩٠٦ ايلينده‌ن سونرا تورکييه، عراق و يا ايران`ين باشقا بؤلگه‌له‌رينده‌ن ياپيلان کورد کؤچله‌رينين، آزه‌ربايجان`ين ميللي سرحه‌دله‌ريني بليرله‌مه‌ده هئچ بير ائتگيسي (تاثيري) اولماياجاغيني ساوونماليييق.

بير داها وورقولاماقدا يارار واردير: ايران´ين قوزئي باتيسيندا ١٩٠٦دان قاباق، توركله‌رله مسكون اولان بوتون بؤلگه‌له‌ر، بوگون كورد، فارس و يا باشقالاري ايله مسكون اولسالار بيله، ايسته‌ر تئهران اوستانينا، ايسته‌رسه ده كوردوستان اوستانينا داخيل ائديلميش اولسالار بيله، موطله‌ق شكيلده آزه‌ربايجان سرحه‌دله‌ري و مرزله‌ري ايچينده قالماليدير.

٣- اورمو-سولدوز مئحوه‌رينين ياشامسال (حه‌ياتي) اؤنه‌مي:

پهله‌وي دؤنه‌مينده، اورمو گؤلونون گونئيينده کيچيک بير بؤلگه ساوجبولاق (ماهاباد) شهريستانينا باغيشلانيپ، بئله‌جه اورمو ايله سولدوز آراسيندا قوپوقلوق اولوشدورولموشدور. بو يوللا بير طره‌فده‌ن کوردله‌ره اورمو گؤلونه چيخيش يولو ساغلانيب، بير طره‌فده‌ن ده سولدوز- تيکان تپه- سايين قالا حتتا بيجار و ...... گله‌جه‌کده کورد ايشغالي قاباغيندا ساوونماسيز بيراخيلميشدير.

اورمو-سولدوز مئحوه‌ري، گونئي آزه‌ربايجان`ين باتي (غربي) سرحه‌دله‌ريني قوروماقدا ياشامسال (حياتي) اؤنه‌مه صاحيبدير. بو مئحوه‌رده هر هانسي قوپوقلوق، قوزئيده اورمو- سالماس- خوي- چالديران- ماکي`نين و گونئيده سولدوز- تيکان تپه- سايين قالا- بيجار- ياسو کن- قوروا- سونقور`ون دوشمه‌سي و راحاتليقلا کوردوستانا ايلحاق ائديلمه‌سي دئمه‌کدير. بو نده‌نله، اورمو گؤلونون گونئيينده ساووجبولاق (ماهاباد) شهريستانينا داخيل ائديلميش ١٩٠٦`دان قاباقکي بوتون تورک بؤلگه‌له‌ري- اينديکي ائتنيک ترکيبله‌ري نه اولورسا اولسون – فئدئرال آزه‌ربايجان`ا عاييددير.

باشقا بير دئييشله هئچ بير قوشول (شرط) آلتيندا اورمو- محه‌ممه‌ديار- سولدوز آراسيندا قوپوقلوغا تابقي (ايذين) وئريلمه‌مه‌ليدير. ائتنيک و يا فئدئرال کوردوستان`ين اورمو گؤلونه چيخيشي يوخدور و اولماياجاقدير.

٤- كوردوستان و كيرمانشاهان اوستانلارينداكي آزه‌ربايجان تورپاقلاري، آزه‌ربايجانا ايلحاق ائديلمه‌ليدير:

پهله‌ويله‌ر دؤنه‌مينده‌ن باشلاياراق، ائتنيک آزه‌ربايجان`ين بيجار، قوروا و سونقور بؤلگه‌له‌ري کوردوستان و کيرمانشاهان اوستانلارينا داخيل ائديليپ، بورايا بير طره‌فده‌ن بؤيوک کورد كؤچ و گيريشي گرچه‌کله‌شيپ، بير طره‌فده‌ن ده بورانين يئرلي تورک اهاليسي، زنجان، همه‌دان و غربي آزه‌ربايجان اوستانلارينا كؤچ (موهاجيره‌ت) ائتميش و ائديرله‌ر.

آزه‌ربايجان و کوردوستان سينيرلاريني تارتيشاندا (موباحيثه ائده‌نده) هميشه بيجار، قوروا و سونقورداکي تورک بؤلگه‌له‌رينين - يعني ١٩٠٦دان قاباق توركله‌رله مسكون اولان بؤلگه‌له‌رين، بوگون كوردله‌رله مسكون اولسالار بيله- موطله‌قه‌ن آزه‌ربايجانا داخيل ائديلمه‌سي وورقولانماليدير. هارانين تورک بؤلگه‌سي اولدوغونو تثبيت ائده‌نده ده، يوخاريدا آچيقلانديغي تكين، بوگونکو ائتنيك-دئموقرافيك دوروم (وضعيييه‌ت) دئييل، ١٩٠٦`دان قاباقکي جمعيييه‌تين ائتنيک ياپيسي (ترکيبي) گؤز اؤنونده (نظه‌رده) توتولماليدير.

غربي آزه‌ربايجاندا بؤكه‌ن (بوكان)، ماهاباد (ساووجبولاق) و ساري داش (سردشت) شهريستانلاريندا بير سيرا کورد يئرله‌شيم مرکه‌زله‌رينين فئدئرال کوردوستان`ا باغلانابيلمه‌سي، حتتا بو قونونون (مووضونون) تارتيشمايا آچيلابيلمه‌سي (موباحيثه ائديله‌بيلمه‌سي)، آنجاق و يالنيز ١٩٠٦دان قاباق توركله‌رله مسكون اولان بيجار، قوروا و سونقور كيمي بؤلگه‌له‌رين، داها اؤنجه‌ده‌ن فئدئرال آزه‌ربايجانا باغلانماسينا مشروطدور.

باشقا بير دئييشله فئدئرال كوردوستان`دا توركله‌رله مسكون اولان بير قاريش تورپاق بيله قالماماليدير. بونا گؤره فئدئرال ايران`ين "كوردوستان`دا ياشايان آزه‌ربايجانليلار و توركله‌ر"ينده‌ن دانيشماق اولماز (بؤيوك كورد شهه‌رله‌رينه كؤچ ائده‌نله‌ر خاريج). چونكو بوتون تورك و آزه‌ربايجان تورپاقلاري كوردوستان و كيرمانشاهان اوستانلاريندان قوپارديليپ يئنيده‌ن آزه‌ربايجانا ايلحاق ائديلمه‌لي و كوردوستاندا ان كيچيك تورك تورپاغي بيله قالماماليدير.

سيياسي ايستيراتئژيک اساسلار

يوخاريداکي تاريخي دئموقرافيک اوصوللاردان باشقا، آزه‌ربايجان-کوردوستان فئدئرال دئوله‌تله‌رين سرحه‌دله‌ريني تعيين ائتمه‌كده سيياسي ايستيراتئژيک اساسلار دا رول اوينايير.

٥- سيياسي-امنييه‌تي ايلكه‌له‌ر: گونئي آزه‌ربايجان`ين توركييه‌يه بيتيشيكلييي گره‌يي

آزه‌ربايجان -تورکييه آراسيندا جوغرافي بير سد و يا آرا-قوپوقلوغون (فاصيله) يارانماماسي، آزه‌ربايجان و تورک خالقينين ايستيراتئژيک چيخارلاري و اؤزه‌لليكله (خوصوصييله) گله‌جه‌كده‌كي کورد و مرکه‌زي فارس-فارسيستان دئوله‌تله‌ري و حتتا ائرمه‌نيستان قارشيسيندا گووه‌نلييينين (امنيييه‌تينين) ساغلانماسي اوچون ياشامسال (حه‌ياتي) اؤنه‌مه صاحيبدير. باشقا بير دئييشله، اگه‌ر تورکييه- ايران سينير بويوندا ١٩٠٦دان قاباق بير سيرا کورد بؤلگه‌له‌ري مووجود اولموش اولسايدي دخي، کوردله‌رله مسکون بئله‌نچي يئرله‌شيم بؤلگه‌له‌ري، گينه ده هئچ بير شرط ايله کوردوستان دئوله‌تينه داخيل ائديله‌مه‌ز.

ايراندا فئدئرال کوردوستان`ين تورکييه ايله اورتاق سينيري (سرحه‌ددي) اولماياجاقدير. ايران`ين قوزئي باتيسيندا (شومال غربينده)، تورکييه`نين بوتون سينير بويو تک قونشوسو آزه‌ربايجان اولماليدير.

٦- اوشنو (اشنويه)، آزه‌ربايجان`ين عراق`ا آچيلان قاپيسيدير:

اسکيده‌ن تورکله‌رله مسکون اولان اوشنو و خانا (پيرانشهر) شهريستانلاري، آزه‌ربايجان`ي عراق`ا - و بو وسيله ايله اورادا ياشايان و کورد ياييلماچيليغي و ظولمونه معروض قالان تورکمان اوجقاراوباميزا (ديياسپوراميزا)- و عره‌ب دونياسينا باغلايان تک گئچيتدير. بو نده‌نله اوشنو (اشنويه) اينديکي ائتنيک ترکيبي نه اولورسا اولسون، موطله‌قه‌ن فئدئرال آزه‌ربايجان سرحه‌دله‌ري ايچينده قالماليدير.

باشقا بير دئييشله، فئدئرال آزه‌ربايجان و عراق`ين، شرطله‌ر نه اولورسا اولسون، اورتاق سرحه‌ددي اولماليدير.

٧- كوردوستان`دان قاچان توركله‌ر سورونو گونده‌مه گتيريلمه‌ليدير:

گونوموزده کوردله‌رله مسکون اولان ساووج بولاق (ماهاباد)، خانا (پيرانشهر)، ساققيز، اوشنو (اشنويه)، بانا (بانه) و.... شهريستانلاريندا ياشايان تورکله‌ر، ١٩٠٦ تاريخينده‌ن سونرا بير نئچه مرحه‌له‌ده، باشدا کوردله‌رين باسقي و سالديريلارينا معروض قالديقلارينا گؤره اؤز تاريخي يورد يووالاريني ترک ائتميش و اورالادان قاچميشلار. بو قاچيش اؤزه‌لليكله اينقيلابدان سونرا داها يئيين (شيدده‌تلي) و تركين (سورعه‌تلي) اولوپ، بؤلگه‌ده‌کي اونلارجا تورک کندي بوشالديلميشدير. حالبوکي بو دؤنه‌مده آزه‌ربايجان`دا ياشايان هئچ بير کورد، بورادان ائتنيك کوردوستان`ا گئري قاييتماميشدير. باشقا بير دئييشله سون يوز ايلده كوردله‌رين ياشاديغي بؤلگه‌له‌رده‌ن توركله‌رين چيخيشي و توركله‌رين ياشاديغي بؤلگه‌له‌ره كوردله‌رين گيريشينه تانيق اولماقداييق.

آزه‌ربايجان و کوردوستان سينيرلاريني (سرحه‌دله‌ريني) تارتيشاندا (موباحيثه ائده‌نده) کؤچ –قاچمايا مجبور ائديله‌ن بو کوردوستان تورکله‌رينين (خانا، ساققيز، ساووج بولاق، ....) قونوسو گونده‌مه گتيريلمه‌ليدير. بونلارين کوردوستان`ا قاييتمالاري، قورولاجاق کوردوستان فئدئرال دئوله‌تي طره‌فينده‌ن ماددي (تورپاق، مال-داوار) ضره‌رله‌رينين قارشيلانماسي، قاييتمالاري مومکون دئييلسه ده اونلارين ساييسي قده‌ر کورد`ون (ويا کورد يئرله‌شيم مرکه‌زينين) فئدئرال آزه‌ربايجان تورپاقلارينا داخيل ائديلمه‌سي شرط قوشولماليدير.

٨- تبريز و ارده‌بيل آكتيويستله‌ري و كورد مسه‌له‌سي:

آزه‌ربايجان`ين کوردوستانلا اولان اورتاق غربي سرحه‌دله‌ري و کورد-تورک مسه‌له‌سي حاققيندا فيکير سؤيله‌يه‌نله‌ر گنه‌لليکله دوغو (شرقي) آزه‌ربايجان و ارده‌بيل اوستانلاريندانديرلار. البه‌تته بو اؤزلويونده پيس بير شئي دئييلدير، حتتا لاپ ترسينه چوخ گره‌کلي و سئوينديريجي بير دورومدور. آنجاق تجروبه گؤسته‌رميشدير کي بو يوردداشلاريميز تورک-کورد و آزه‌ربايجان-کوردوستان مسه‌له‌سينه درينده‌ن و هر طره‌فلي بله‌د دئييلديرله‌ر.

بو اوزده‌ن بو مسه‌له‌له‌ر حاققيندا موطله‌ق شکيلده يئرلي اهاليده‌ن اولان آيدين و چاباچيلاريميز (آکتيويستله‌ريميز) - و اؤنجه‌ليکله باتي آزه‌ربايجان (اورمو، سولدوز، تيكان تپه، ماكي، سالماس، خوي، سايين قالا، قوشاچاي، ...)، کوردوستان (بيجار، قوروا، ياسسو کن، سونقور، ...) و همه‌دان (باهار، اسه‌داباد، كؤوره‌نگ، توي سركان، ....) اوستانلاريندان اولان چاباچيلار سؤز صاحيبي اولمالي و اؤن پيلانا چيخماليديرلار.

گرچه‌يه هو

0 Comments:

Post a Comment

<< Home