سایین قالا (شاهین‌دژ) و قوشاچای (میاندوآب) ین میللی فعاللارینا- چاغداش تبریزلی

سایین قالا (شاهین‌دژ) و قوشاچای (میاندوآب) ین میللی فعاللارینا- چاغداش تبریزلی



مساله‌نی اورتایا چیخارتمادان اؤنجه اوشاقلیغیمدا یاخیندان شاهید اولدوغوم بیر اولایی (حادیثه‌نی) سؤیله‌مک تام یئرینده اولار.

اؤز آرامیزدا کئچیریلن اوشاقلار آراسی اویونلاردا، "توحید" آدلی بیر اوشاق حددیندن آرتیق اولگون و چیرکین اولدوغونا گؤره، توحید جنازه آدی وئره‌رک، اونو اؤز ایچیمیزدن دیشلاییردیق. اوشاقلیق سوره‌میز بیته‌نه قده‌ر، اونو بو یاپیشدیرما آدلا سسله‌ییردیک. آنجاق ایلکین گونلرده اونون قارشی‌دورماماسی بیر آز دا اودو آلیشدیریردی؛ چوخ آز بیر زاماندا اؤزونو بیزلره قاتماق نیتی ایله " توحید جنازه‌نی‌ده اوینادین" دئیه بیر یالواریش ایچریسینده سانکی یاپیشدیرما آدینی سسله‌مکده هئچ بیر زورلوق چکمیردی، زامان سووشور و اؤز آدینا اینانیردی، داها سونرالار اؤزو بیزلردن داها چوخ یاپیشدیرما آدینی چکمکدن ذؤوق آلیردی.



بینابی سووشموش و باتی آذربایجان سینیرلارینا گیردیگیمیزده یولون اوستونده تیکیلی بینالارین دووارلارینداکی رئکلاملار (تبلیغات) دئییشیر: "فرش آریا بافت کردستان" ، "فرش نجفیان کردستان" ، "فرش نفیس کردستان"و ... کی بوتون بو دووار یازمالارین "کردستان" حیصه‌سی آیری بیر یازی‌ ‌شکیلینده (فونت) یازیلیب دیر.

آدینی چکدیگیم یازیلار ایری اؤلچوده بوتون بیناب، قوشاچای، سایین قالا، تیکان تپه (تکاب) شهرلرین بیری بیرینه باغلایان یوللارینی اله آلیب دیر. بو سؤزده رئکلام (تبلیغ) یازیلارینین، بول بول گؤزه چارپماسی بیزیکدیریجی دیر و اینانیلماز درجه‌ده پیسیکولوژیک ائتگی‌‌لر بوراخماقدادیر.

آدینی چکدیگیم شهرلرین دیشیندا (خاریجینده) کی یوللاری سووشان‌لارین بیر دقیقه ده گؤزونه ان آز بیر "کوردستان" یازیسی ساتاشیر.

عجبا سنندج و کیرمانشاهی بوراخیب، نده‌ن آذربایجان شهرلرینده، بو سؤزده رئکلام‌لاری همیده گئنیش چاپدا یازماغی اویغون گؤروب‌لر؟!

بو یوللاری سووشان، طرفسیز و مساله‌دن خبرسیز بیر اینسان، اؤزوده نه کورد و نه ده تورک اولان بیریسیندن، "گؤزونوزه یول بویو هر شئی‌دن داها چوخ نه ساتاشدی؟" دئیه سوروشدوغوموزدا، شوبهه‌سیز کی "کوردوستان" سؤزونو جاواب اولاراق آلمیش اولاجاغیق. بو چوخ اوزوجو و آیریجا دیققت‌چکیجی دیر. اصلینده او بویدا و او گئنیشلیکده یازیلمیش اولان یازیلاری گؤروب‌ده "کوردوستان" آدینین بئیین‌لرده جانلانماماسی غئیر عادی دیر.

ایران یاسالاری ایله بونون قارشیسین آلماق چوخ راحات دیر. هر یئر ده اولدوغو کیمی ایراندا دا اؤزه‌ل بینالارین دووارلاری، اییه لرینین (صاحیب لرینین) ایذینی اولمادان رئکلام یازماق اوچون قوللانیلماز.

اونون اوچون ده بو شهرلرین میللی فعاللاری گره‌ک مساله‌نی بیر دفعه‌لیک اورتادان قالدیریب و آذربایجان شهرلرینین اوستونه یاپیشدیریلمیش یابانجی‌ آدلارین رئکلام دان داها چوخ سیاسی آغیرلیق داشیدیغینین فرقینده اولالار.