قاراباغدا يول وئريلن سهولري باتی (غربی) آذربايجاندا تکرار ائتمک اولماز - صمد نيکنام

قاراباغدا يول وئريلن سهولري باتی (غربی) آذربايجاندا تکرار ائتمک اولماز - صمد نيکنام

گونئي آذربايجاندا و ايراندا پارلامئنته سئچکيلرين ايلک مرحله سي سونا يئتدي. بير چوخ بؤلگه لرده ايکينجي مرحله لي سئچکيلر اولاجاق. سئچکيلره قاتيلماق آذربايجان ميلتي نين چاغداش ميللي موباريزه سي نين ان اؤنملي ايشلريندندير. بونو بيزه هاميليقلا قبول ائتديگيميز، هرکاتيميزين ميللي مضمونو، دئموکراتيک ماهيتي و مدني موباريزه مئتودو ديکته ائدير.

آذربايجان ميلتي نين چاغداش ميللي موباريزه سي نين آماجي و موباريزه يولو دينج و مدني يولدور. بو موباريزه عئيني زاماندا اؤزل آداملارين، قروپلارين و ايديعالي دسته لرين اينحيصاريندا دئييل، بلکه بوتون ميلتين موباريزه سيدير.

بيز بو ايشده زامان، مکان و حرکت دئييب يولا چيخميشيق. زامانيميز اينسان هاقلاري نين قورونماسي و ميلتلرين اؤز ميللي طالعييني هلل ائتمک زامانيدير. مکانيميز دونيايا حاکيم بؤيوک دؤولتلرين منافعيي نين کسيشديگي يئر، عاصييا قيته سيني آوروپا قيته سي ايله بيرلشديرن آذربايجان آدلي جوغرافي مکاندير. بو زامان و مکان عاميليني نظره آلاراق موباريزه ميزين حدفي ايلک نؤوبه ده وطنيميزين بوتؤولوگونو قوروماق، تورپاقلاريميزدا هر هانسي سئپاراتچي و تروريست دسته لرين فاليتينه سون قويماق و ميللي، مدني، سياسي و ايجتيماي، ايقتيصادي هاقلاريميزا يييلنمکدير.

موباريزه ميزين آماجلاري سيراسيندا يئر آلان بير سيرا مثله لرده سيرالاريميز داها گئنيشدير. تورپاقلاريميزا قارشي اراضي ايديعاسي ايله چيخيش ائدن تروريست دسته لرله موباريزه ده، بو تورپاق اوزرينده ياشايان بوتون اينسانلار بيرلشمه لي و بير مؤوقئدن چيخيش ائتمه ليدير.

اراضيلريميزين ياد يئرلردن گلميش تروريستلردن تميزلنمه سينده بوتون دؤولت و هؤکومت اورقانلاري ايله امکداشليق ائتمه لي و آذربايجانين خريته سي نين دييشمه سينه يول وئرممه ليگيک. آذربايجان اراضيلرينده، اؤزلليکله باتی (غربی) آذربايجاندا يووا سالميش و سيلاه آنبارلاري گيزلتميش کورد تروريستلري ايله موباريزه ده اوردو، سپاه و باشقا دؤولت اورقانلاري ايله امکداشليق ائتمه لي و وطنيميزي تروريستلردن تميزلمه ليگيک. بو ايشده دؤولتين صلاحيتلي اورقانلاري سهلنکارليغا يول وئررسه، اونلارين قارشيسيندا مسئله قالديرمالي و کورد سيلاهلي ياراقليلاريني ترکسيلاه ائتمه يه چاغيرماليييق. بو ايشده ميلتين اوردو قوللوقچوسو، پاسداري، موللاسي، ايمامجومه سي، بسيجيسي، ميلت وکيلي و بير سؤزله بوتون ميلت بير سؤز دئمه ليدير. بو تهلوکه لري گؤز اؤنونه آلاراق بوتون آذربايجان اوزره سئچکيلره آکتيو قاتيلمالي و تورکلره سس وئرمه ليگيک.بای بک

آذربايجان ميلتي نين موباريزه سي ميللي و سياسي موباريزه دير. سيياست ايسه آجيقلي، عصبي، گرگينليک و هؤوسله سيزليکله يورودولمور. چيلغين ايفاده لرله شخصي تسسوراتيني سياسي موباريزه کيمي قلمه وئرنلرين هاي-کويو ايله دؤيوشه گئتمک اولماز. سياسي رئالليقلاري گؤرمک عوضينه ميلته اينتيقام هيسسي آشيلاماغا جهد ائدنلر سهو يولدادير. سياسي حرکت دوشونولموش و تدبيرلي اولماليدير. سياسي هرکاتدا سهوه يول وئرسک فلاکت باش وئرر. لاپ ائله قاراباغدا باش وئرنلر کيمي.

قاراباغدا تجروبه ائتديکلريميزي گونئي آذربايجاندا بير داها تجروبه ائتمه يه حاقيميز يوخدور. مووققتيده اولسا قاراباغي ايتيرميشيک و گئري قايتارماسي آذربايجان ميلتينه آسان و اوجوز باشا گلميه جک. قاراباغ، سيياستده يول وئريلن سهولر اوجباتيندان ايتيريلدي. بو سهو سيياستي يورودنلر خالق جبهه سي و عئيني زاماندا بوگونکو موخاليفت ايدي.

مسئله بوندان عيبارت ايدي کي، ۱۹۸۰-اينجي ايللرين سونلاريندا داغليق قاراباغ ائرمنيلري، بؤلگه ده آذربايجان سووئت هؤکومتي نين حاکيميتيني آرادان قالديرماغا چاليشديلار. بو زامان آذربايجاندا اؤزونو اورتا موخاليفت آدلانديران آيدين مممدوو و ايسماييل تاريخپئيما آذربايجان سووئت هؤکومتي نين قارشيسيندا مثله قالديراراق، آذربايجان سووئت سوسياليست دؤولتي نين حاکيميتيني داغليق قاراباغدا برپا ائتمه يه و گوجلنديرمه يه چاغيرديلار.

اونلار اوزاق گؤرن ايديلر و دوشونوردولر کي، سووئت هؤکومتي نين کؤمگي ايله آذربايجان سووئت سوسياليست دؤولتي نين حاکيميتي داغليق قاراباغدا برپا اولمالي و بونونلا دا، اورادا ائرمني ترور و سئپاراتچي دسته لري نين فاليتينه سون قويولماليدير. اونلارين بو ايستگي قانوني اويغون ايدي و آذربايجان سووئت دؤولتي نين رهبرلري ده اونلارلا راضيلاشير و تدبير گؤرمه يه حاضير ايديلر. بئله ليکله، سووئت هؤکومتي داغيلاندان سونرا آذربايجانين ترکيبينده ائرمني تروريستلريندن و سئپاراتچيلاريندان تميزلنميش قاراباغ قالاجاقدي.

تأسوفلر اولسون کي، ميلتچيليک شوعاعرلاري ايله و ميلته اينتيقام هيسسي آشيلاياراق آلوولو چيخيش ائدن خالق جبهه سي نين رهبرلري بو اوزاق گؤرن سيياستين معناسيني آنلامادي. اونلار ” بيز آذربايجان سووئت هؤکومتيني تانيميريق و اونون حاکيميتي نين ده اورادا برپا اولونماسيني ايستميريک ” دئيه رک، بؤلگه ده ائرمني سيلاهلي بيرلشمه لري نين فاليتينه شرايت ياراتديلار.

بو گون بيزي آذربايجاندا (ورمييه ده) يالنيز بير ائوده ۱۰۰ عدد خومپاره گيزله دن کورد تروريست دسته لري ايله دئييل، تروريستلرله ووروشان ايمام جومه هسه ني ايله ساواشا چاغيرانلار، خالق جبهه سي نين قاراباغدا يول وئرديگي خيانته برابر سهولري تکرار ائتمه يه چاغيرير.بای بک

ائرمنيلر داغليق قاراباغدا سيلاهلي دسته لر ياراديب وطني پارچالاماق ايسته ينده، خالق جبهه سي نين رهبرلري موباريزه نين ايستيقامتيني باکي نين دمير يولو واغزالينا يؤنلده رک، فهله لري واقونلاري بوشالتماماغا چاغيرديلار. پارلامئنته سئچيلسه لر ده، ايجلاسلاري بويکوت ائديب، گيزلين-پالان اويناماغا باشلاديلار. نتيجه ايسه گؤز قاباغيندادير.

الده ائتديگيميز تجروبه لره داياناراق، گونئي آذربايجاندا و ايراندا سئچکيلرين نؤوبتي مرحله سينده داها آکتيو اولماليييق و جومهورييئ ايسلامي نين ايمکانلاريندان ايستيفاده ائده رک بوتون آذربايجانا يييه دورماليييق. آذربايجان شهرلريني کورد تروريستلريندن تميزله مه لي و ميللي موباريزه ميزي تروريستلردن آزاد اولموش وطنيميزده آپارماليييق. آذربايجاني تروريستلردن تميزله مک دؤولتين بورجودور. آذربايجانين بوتون بؤلگه لريندن ميلت وکيللري سئچيب پارلامئنته گؤندرمه لي و ايستکلريميزي اونلاردان طلب ائتمه ليگيک. سئچکيلره قاتيلماساق کيمسه دن نه ايسه طلب ائده بيلمريک.

سئچکيلري بويکوت ائدنلرين عملي اونا بنزه يير کي، “آيي مئشه دن کوسوب، مئشه نين خبري يوخ”. (ازربايجان آتالار سؤزو).

سئچکيلري بويکوت ائتمکله هئچ بير شئي الده ائتمک اولماز. بويکوت، يالنيز اينقيلاب و چئوريليش عرفه سينده کئچرلي اولا بيلر. بيز ايسه دينج و مدني موباريزه آپاريريق. سئچکيلري بويکوت ائتمه يه چاغيرانلارين هئچ بير آلتئرناتيوي يوخدور. دونن نه ائتديکلريني بيلمه ديکلري کيمي، بو گونده نه ائده جکلريني بيلميرلر.

آذربايجان ميلتي نين موباريزه سي، آماجلاري و شوعاعرلاري، شاهچيلارين، تروريستلرين، سوسيال-شووينيستلرين و بير نئچه نفردن عيبارت، باشقا باشيپوزوق ييغينجاقلارين شوعاعرينا بنزه مز.

آيري-آيري مسئوليتسيز دسته لرين بويکوت شوعاعري نين آرخاسيندا هئچ بير مسئوليت داشييان يوخدور.

بيز ايسه بير ميلت کيمي بو اؤلکه ده ياشاييريق و اؤلکه نين رئالليقلاري ايله باريشمالي و موباريزه ميزين يولونو و يؤندميني ده رئالليقلار اوزرينده قورماليييق.

۱۹/۰۳/۲۰۰۸