کورد-لرين اراضي ايددياسينين داها بير تظاهورو

ايرانين «انتخاب» آژانسي تورکيه نين «دوغان» خبر آژانسينا ايستينادلا کوردلرين اراضي ايديعالاريني عکس ائتديرن داها بير فاکتي ايشيقلانديرميشدير. بو فاکت مسعود بارزاني طرفيندن ايداره اولونان عراق کوردوستانيندا پليس ماشيني اوزرينده «بؤيوک کوردوستان» خريته سي نين وئريلمه سيندن عيبارتدير. همين خبره علاوه اولاراق وئريلن بير خريته بو آد آلتيندا هانسي تورپاقلارين نظرده توتولدوغونو آيدين گؤسترير.

بللي اولور کي، گونئي آذربايجان و تورکيه اراضيسي نين بؤيوک بير حيصه سي ده بو مفهوما داخيل ائديلير. خريته ده جنوبي قافقاز بؤلگه سي نين س.س.ر.ي (شوروي) کيمي گؤستريلمه سي اونون تاريخي باره ده ده تصوور اويادير و نئجه دئيرلر، تزه صؤحبت اولماديغيني آشکارلايير. هله س.س.ر.ي- نين مؤوجود اولدوغو دؤوره آيد خريته ده قوزئي آذربايجاندا يئرلشن و حاضيردا ائرمني ايشغاليندا اولان کلبه جر رايونونون خوصوصي گؤستريلمه سي ده تسادوفي ساييلماماليدير. اوسته ليک بو خريته ايله پليس ماشيني اوزرينده کي خريته نين کونتورلاريني توتوشدورساق، بورايا يئني اراضيلرين، او جومله دن قوزئي آذربايجانا مخصوص بعضي تورپاقلارين علاوه اولوندوغونو گؤره بيلريک.

«انتخاب» آژانسي عراق کوردوستاني رهبرليگي نين دفعه لرله قونشو اؤلکه لرين پارچالانماسي نين علئيه اينه اولدوغونو بيان ائتديگيني وورغولاياراق سوروشور: اگر بئله ديرسه، اوندا بو خريته ايراق کوردوستانينداکي پليس ماشينلاري نين اوزرينده نه ائدير؟ آژانس اونو دا قئيد ائدير کي، برزاني صدامين حاکيميتي زاماني ان چوخ ايراندان کؤمک آلميشدير و اؤز موصاحيبه لرينده ايرانليلارا بورجلو اولدوغونو بيلديرميشدير.mesih