یئنی خالقلار ، یئنی یوردلار قونداریلیر
مارس 11th, 2007 at 1:27 pm (تاریخ)


آذربایجانین هر حصه سی نین بیر مدعیسی وار. یقین کی بو مدعیلرین آرا- سیرا توخومالارینی اوخویوب یا ائشیتمیسیز. بونلاردان بلکی ده ان گولونجو کئچن آی اورمودا اولدوغومدا منه راست گلدی. بیر قوناقلیقدا کورد بیر اوغلان اورمیه نین اصلینده کورد بیر شهری اولدوغونو آنجاق کوردلر شهر حیاتینی سئومه دیکلری اوچون داغا چکیلدیکلرینی و تورکلرین بورایا یئرلشدیکلرینی ادعا ائدیردی. اوشاقلارین ناغیلینا بنزر بو ادعالار گولونج نظره گلسه ده، سؤیله ینده بو ادعایا قارشی اولان گوجلو اینام حسی گؤستریردی کی بئله گولونج ادعالارا گولونج یوخ قورخونج باخمالی ییق. الله بیلیر بو بوش بئیینلردن نه قدر یئتیشمکده دیر. یئنی بیر میللت، یئنی اویونلار یارانماق اوچون نلر اویدورولمور.

کوردلرین تاریخی نین نامعلوملوغو و تاریخسیزلیگی ده بئله ادعالارا، یئنی تاریخ یازمالارا یول آچیر. ایراندا کوردلر اؤزلرینی مادلارا باغلاییرلار. تورکیه ده سومره. عراقدا ایسه عربلره و یئنه ده بابیل - سومئرلره. مسئله بوراسی دیر کی بو ادعالارین هامیسی دا قومی افسانه دیر . کوردلر فارس دیلینه یاخین مختلف دیللرده دانیشیرلار. اونلاری سومر، قوتی، لولوبی کیمی التصاقی دیللیلرین نسلیندن سایماق بورادا بؤیوک بیر تناقض اورتایا قویور. مادلارین دا مختلف قبیله لری نین اولدوغونو بیلیریک. آنجاق دیل منسوبیتی قطعی اولاراق بللی دگیل. یوخسا بو ادعالارا گؤره کوردلرین چوخ قاریشیق بیر کئچمیشی وار؟ ادعانی ایرلی آتانلار بو قاریشیقلیقدان بالیق توتوب بیر میللت یاراتماغا چالیشیر. آمما حقیقت باشقا جوردور.

کورد میللتی سؤزو ، واحد بیر کورد خالقیندان دانیشماق دا معین درجه ده سهودیر.اؤزو کورد اولان یاسمی یازیر: ایرانلیلار قدیم دؤورلرده کورد دئدیکلری زامان خصوصی بیر خالق و نژاددان یوخ عمومیلیکده چؤل حیاتینی سورنلری قصد ائدیردیلر. استخری و باشقا قدیم تاریخچیلر ده بو سؤزو بیر خالق معناسیندا یوخ خصوصی بیر معیشت طرزی یعنی کؤچری حیات سورنلری نظرده توتوردولار.تدقیقاتچی ان لمپتن ده قدیم تاریخچیلرین کؤچری و یاری کؤچریلر اوچون عمومی الاکراد سؤزونو استفاده ائتدیکلرینی یازیر. .(ایران، هویت، ملیت، قومیت، ص. 442و441)ائله بو گون ده اؤزلرینی کورد آدلاندیرانلار و یا قونشولار طرفیندن کورد آدی آلانلار مختلف دیللرده دانیشان ( بو دیللر بیر بیرلرینه چوخ زامان آنلاشیلمازدیر) مختلف ائتنیکلردیرلر.ماراقلی بوراسی دیر کی بؤیوک ائرمنستان خریطه لریندن سونرا، بؤیوک کوردوستان خریطه لری ده بازارا گلیبدیر. البته کی بو خریطه نین ده بؤیوک حصه سی آذربایجان اراضیسینده قورولور.

بیر حالداکی تاریخی کوردوستان تمامی ایله باشقا یئرده دیر. بیرینجی دفعه کوردوستان سؤزو سلجوقلولار دؤورونده ایشله دیلدی. بو سؤز بوگونکو کرمانشاه منطقه سی ایله عئینی لشدیریلیر.(همان، ص. 443)یقین کی بوگون خوی، ماکی، سالماس و اورمولو تورکلره« کوردوستان اراضیسنده یاشایان قوناقلار » کیمی خطاب ائدن و اوره کلرینده بو قوناقلارین تئزلیکله بورالاردان چیخیب گئتمه سینی آرزو ائدنلر اصلینده بو حقیقتدن خبرسیز دگیللر. آمما نئجه دئیرلر گمییه مینیب گمیچی گؤزو چیخاردانلار دا بیزه راست گلیر. دونن ائرمنیلر، بو گون کوردلر. آلله صاباحیمیزی خیر ائله سین.