10/11/85

باتي آزربايجاندا نه اوز وئرمکده دير

نئچه گوندور آزربايجان`نين باتيسيندا اولان خوي، اورمو و سالماس شهه رلرينده قانلي دؤيوشلر اوز وئرير و چئشيدلي خبرلر بو دؤيوشلردن ياييلماقدادير. گونئي آزربايجان و اؤزه لليکده ميللييتچيلر بو اولايا گؤره خبرسيزديرلر و يالنيز کوردلر يا دا حاکيمييت طرفيندن ياييلان خبرلرين اوخوجولاريديرلار. بو توققوشمالارين بير اؤنه ملي حيصصه سي خوي`ون جهننم دره منطقه سينده اوز وئريبدير کي ميللييتچي دوستلار اوچون بورادا بير پارا دئتالار وئريرلير.

جهننم دره خوي`ون بات سيندا تورکييه مرزينين اون کيلومئتريسينده يئرله شير. بو دره اسکيدن ايستيراتئژيک بير نوقطه سايلير. مين ايللردن بري بورادا بؤيوک قالالار قورولوب و ياغيلار بو قالالارا سيغينيب حٶکومتلر علئيهينه دؤيوش آپاريبلار. دره ايپک يولو اوستونده اولدوغو اوچون يول کسه نلري اؤزونه طرف چکيب و بو يول کسه نلرين اثرلري هله ده اونون هر نوقطه سينده گؤزه وورور. آزربايجان`ين آدليم اوسطوره سي کورواغلو`نون دا قالالاري بو دره ده دير و کوروغلو`نون ناغيليندا اولان آدلارين بير چوخو بوردا داغلارين، دره لرين، گؤللرين و ياماجلارين آديدير. بو دره ايکي طرفدن مين مئتره ياخين داشلارلا ايحاطه اولوب ائله کي گويو گؤرمک چوخ چتين اولور و دره هميشه قارانليق اولدوغو اوچون جهننم دره آدلانيليبدير. بو دره تورک کندي اولان قريس کندينين کٶوشني ساييلسا دا باتيدا کورد يايلاقلارييلا قونشو اولدوغو اوچون کورد ياغيلارينين سيغيناجاغينا چئوريليبدير. بو دره ده ايللر بويو پ.ک.ک ياغيلاري و ايندي ده پژاک ياغيلاري ياتاق ساليب و چوخ واقتلار امنييتله ياشاييبلار!

آمما توققوشمالارين نئجه اوز وئردييني ياخين کندلرين اهاليسيندن ائشيتديييم کيمي سيزلره چاتديريريق. جهننم دره نين قونشولوغوندا «بره جوح» آدلي بير کورد کندي واردير. نئچه گون دارتيشمالاردان قاباق بير نئچه عسگر پژاک`ين آداملارينين بيريني توتماق اوچون گؤنده ريليرلر آمما بو عسگرلر « بره جوح» کندينه يئتيرمه ميش موحاصيره يه دوشوب و پژاک چئريکلري اليله اٶلدورلورلر. اونلاري جنازه لري منطقه ده نئچه مئتيرليک قارين آلتيندا قالير و سيپاه`ين نيرولاري اونلاري نيجات وئره بيلميرلر. هميشه کي کيمي سيپاه`ين فرمانده لري بير نيماييشي عمليياتدا اؤزلري منطقه يه باش وورماق اوچون بير هئلي کوپتئرله جهننم دره يه گئديرلر و هاوانين دومانلي اولدوغو اوچون هئلي کوپتئر سوقوط ائله ييب، هاميسي اٶلورلر.

آمما بو حاديثه ده سرتيپ حاج حنيف درستي ده جانيني الدن وئريبدير. حاج حنيف باتي آزربايجان`دا و اؤزه لليکله خوي`دا تانينميش بير آنتي کورد سرداريدي. او باتي آزربايجان`دا نيظامي قووه لر ايچينده کوردلرين حرکتلريني ياتيرتمادا بيرينجي رولو اولوب و دؤنه لرله پيرانشهر`ي، ماهاباد`ي، سردشتي و... اونلارين اللريندن قورتارميشدي. او حاکيمييتدن اولماغينا رغمن کوردلر قاباغيندا آزربايجان`ين شهه رلريندن مودافيعه سي اوچون تانينميش و تاثيرلي بير نيظامي ايدي. حاج حنيف جندالله آذربايجان`ين قوروجوسو و بؤيوک بير چئريکييدي. اونون اؤلومو کوردلرين گله جک حرکتلرينه چوخ تاثير قويابيله ر.