آذربايجان خالقی ايله کوردستان خالقینين منافع بيرليی

۱ ارديبهشت ۱۳۸۵
آذربايجان دموکرات فرقه سينين ناشر افکاری
بئشينجی دؤور ١١- جی نمره

نوت: در شمال غرب ايران از "آذربايجان و قزوين " نميتوان سخن گفتּ زيرا همه توده ترك و نواحي ترك نشين شمال غرب ايران شامل قزوين جزئي و داخل در آذربايجانندּ

آذربايجان خالقی ايله بيرليکده کوردستان خالقینين منافعلری و حقوقلاری پوزولور. بو خالقلارين دوشمنلری تاريخ بويو بو خالقلارين دوستلوق ياراديب بيرگه موباريزه آپارمالارينا نه اينکه مانع اولموشلار، حتی اونلارين آراسيندا دوشمنچيليک توخومو و اوچوروملار ياراتماغا چاليشميشلار. حالبو کی، شاهليق رژيمی بو ايکی خالقين عينی درجه ده انکشافينا مانع اولموش، انکشافلاری نين قارشيسينی آلميش، ديللرينی لغو ائتميش، مدنی جهتدن اونلارين ايره لی گئتمه لرينه انگللر تؤرتميشلر. بو ايکی خالقين آراسيندا ضديتلری درينلشديرمک مقصديله اونلارين اراضی بوتؤولويونو دوزگون بؤلوشدورمه ميشلر.

هر ايکی قارداش خالقين منافعلرينه خدمت ائتمک اوچون بيرينجی نؤوبه ده موباريزه بيرليینين يارانماسی اهميتینی درک ائتمک لازيمدير. آذرباجان خالقی ايله کورد خالقی آراسيندا يارانان شفاف و صميمی دوستلوق ١٩٤۵- ١٩٤۶- جی ايللرده کی کيمی مؤحکم و سارسيلماز اولماميشدير. شوبه يوخدور کی، اوچ قات ظولمه معروض قالميش بو ايکی خالقی بيری بيرينه باغلايان اساس عاميل اونلارين بيرليی و صميمی دوستلوق ياراتمالاری اولماليدير. بو دوستلوق ١٩٤۵- ١٩٤۶- جی ايللرده باش وئرميش ميللی آزادليق حرکاتيندا آذربايجان فدائيلری ايله کوردستان پيشمرگه لری (فدائیلری) آراسيندا يارانميش هم رأی ليک، هم آذربايجانين و همده کوردستان اراضیلرینين شاه رژيمی و ارتجاعنين سلاحلی قووه لريندن تميزلنمه سينده بؤيوک رول اويناميشدير. عينی زاماندا شاه قوشونلارینين کوردستان اراضيسيندن آذربايجانا هوجوم ائتمه لری حاققيندا تکليفلری کوردستان رهبری قاضی محمدين رد ائتمه سی دوستلوغو داها دا مؤحکم لنديرميشدير.

١٩٤۵- جی ايلين اوکتيابر آييندا عيراق کوردستانینين رهبری موللا موصطفی بارزانی نين باشچيليق ائديی ١۵۰۰ نفرليک آتلی سيلاجلی دسته لرين محمد مولوديانين باشچيليق ائتديی ۵۰۰ نفرليک کوردستان پيشمرگه لری (فدائيلری) گئنرال ابوالقاسيم عظيمی نين باشچيليق ائديی ۲۰۰۰ نفرليک سيلاحلی فدائی دسته لری هم آذربايجان و هم ده کوردستان اراضی لرینين شاهليق رژيمینين سلاحلی قووه لريندن تميزلنمه سينده بؤيوک رول اويناميشدير. آذربايجان فدائيلری ايله کوردستان پيشمرگه لری واحيد دوشمنه قارشی بير جبهه ده وورشمالاری ايکی خالقين آراسيندا دوستلوغون مؤحکملنمه سينه گوجلو تاثير گؤسترميشدير.

آذربايجان فدائيلری ايله کوردستان فدائيلری آراسيندا يارانميش مهربان دوستلوق ايرانين سيلاحلی قووه لری آراسيندا موثبت تاثير بوراخميشدير. بونون نتيجه سينده شاه رژيمینين دسته لری ايچريسيندن يوزلرله ضابط و عسگر اؤز سيلاحلاری ايله فدائيلرين طرفينه کئچيرديلر.

آذربايجان ميللی حؤکومتی ايله کوردستان ميللی حؤکومتی آراسيندا مؤحکم دوستلوغون يارانماسيندا سيد جعفر پيشه وری و قاضی محمدين بؤيوک روللاری اولموشدور. اونلا هر ايکی خالقين دوستلوغونون اهميتینی سياسی جهتدن درک ائتميش و عملی صورتده تدبيرلر گؤرمه يه چاليشميشلار.

آذربايجان ايله کوردستان آراسيندا حربی، اقتصادی و سياسی علاقه لرين داها دا مؤحکملنديريلمه سی مقصديله داها بؤيوک اهميتلی موقاويله لرين باغلانماسينا چاليشيرديلار.

امپرياليزم و ارتجاعنين کؤمه يی ايله آذربايجان ايله کوردستان آراسيندا تخريبات ياراتماغا چاليشيرديلار. بئله ليکله ده ايرانين باش حربی قرارگاه رييسی حسن ارفع ين رهبريتی آلتيندا (نهضت ملی) آدلی مورتجع بير تشکيلات ياراديلدی. بو تشکيلاتا آذربايجان و کوردستاندان قاچان ضابطلری جلب ائديرديلر کی، اونلار و آذربايجان و کوردستان سرحدلرينده تخريبات ايشلرينی آپارماغا سفربر ائديلسينلر.

ائلجه ده ١٩٤۶- جی ايلين اوللينده قزوين شهرينده (اصلاح طلبان) آدلی جمعيت و (فداکاران آذربايجان) آدلی مورتجع قروپلار تشکيل ائديب بورا آذربايجان و کوردستاندان قاچان فئوداللار، خانلار و مورتجع مجليس وکيللرينی جلب ائديب اونلاری سيلاحلانديريب آذربايجان و کوردستان اوزه رينه گؤندريرديلر. ايران کوردستانيندان گئری چکيلن دؤردونجو لشکر همين مورتجع دسته لری سيلاحلا تامين ائديردی.

بو زامان سرتيپ (گئنرال) هومايونون فرمانده ليی آلتيندا کوردستان سرحدلرينه موعاصر سيلاحلارلا سيلاحلانميش دؤلت قوشونو توپلانيردی. ساغقيز، باننا (بانه)، سردشت منطقه لرينده بيرلشميش دؤلت قوشونلاری ماهابادا هوجوم ائتمه يه چاليشيرديلار. بئله بير آغير شرايطده آذربايجان و کوردستان آزادليغينا قارشی يارانان تهلوکه نی آرادان قالديرماق اوچون آذربايجان ميللی حؤکومتی ايله کوردستان ميللی حؤکومتی آراسيندا ١٩٤۶- جی ايل آپرئل آيینين ۲۲- ده آذربايجان ميللی مجليسینين تبريز شهرينده کی بيناسيندا سيد جعفر پيشه وری و قاضی محمدين باشچيليغی ايله هر ايکی قارداش خالقين نوماينده لری آراسيندا دانيشيقلار باشلاندی.

دانيشيقلار زامانی بير سيرا موهوم دؤلتی تدبيرلرين موذاکيره سی ايله برابر دوشنمه قارشی حربی امکداشليق ائديلمه سی اوچون قرار قبول ائديلدی. قرارين دؤوردونجو ماده سينده دئييليردی: (آذربايجان و کوردستان ميللی حؤکومتلری آراسيندا حربی همکارليق ياراتمالی، لازيم گلن واختلاردا هر ايکی حؤکومتين حربی قووه لری لازيمی امکداشليق ائتمه ليدير) بو موقاويله يه اساساً هر ايکی حؤکومتين آراسيندا باش وئرن تهلوکه نی آرادان قالديرماقدا بير بيرلرينه حربی قووه ايله کؤمک ائتمه لی ايدلر. بوندان سونرا کوردستان خالق قوشونلارینين فرماندهی گئنرال محمدحسين خان سيد قاضی نين رهبرليی آلتيندا گوجلو پيشمرگه دسته لری سردشت، ساغقيز و باننا (بانه) جبهه لرينه گتيريلدی. همده موللا موصطفی بارزانی و باشقا فرمانده لرين رهبرليی آلتيندا سيلاحلی فدائی دسته لری بورا گلدی.

ائلجه ده کورد فدائيلری زنگان، هولاسو و سائين قالا جبهه لرينده آذربايجان فدائيلری ايله بيرليکده دوشمنه قارشی ووروشوردولار. آذربايجان فدائيلری ده گئنرال ابوالقاسيم عظيمی و مايور محمدعلی رامتينين باشچيليقلاری ايله ۲۵۰۰ نفر فدائی کورد پيشمرگه لرينه کؤمک ائتمک مقصديله قوشاچایدان(مياندواب) بوکان منطقه سينه بورادان ساغقيز جبهه سينه گلميشلر. بئله ليکله ده آذربايجان و کوردستان بيرلشميش فدائی دسته لری ١٩٤۶- جی ايلين مای آيينا قدر شاهليق رژيمینين سيلاحلی قووه لرينی آذربايجان و کوردستاندان تميزله ديلر. ائلجه ده ايرانين سيلاحلی قووه لرينه بؤيوک تلفات وئرمه سيله علاقه دار مورتجع شاهليق رژيمی گئری چکيلمه يه مجبور ائديلميشدير.

بو زامان ايرانين باش ناظيری احمد قوام السلطنه کوردستانين ميللی حؤکومتینين باشچيسی قاضی محمده تلگراف گؤندره رک بيلديرميشدير کی، (ايران قوشونلاری نين کوردستان اهاليسی ايله ايشی اولماياجاقدير يالنيز خاهيش اولونور کوردستان ميللی حؤکومتی ايجازه وئرسين ايران قوشونلاری کوردستان اراضيسيندن آذربايجانا هوجوم ائتسين) قاضی محمد ايسه همين تلگرافين جاوابيندا بيلديرميشدير (تهران قوشونلاری آنجاق او گون کوردستاندان آذربايجانا هوجوم ائده بيلر کی بيزی تماميله محو ائده بيلسين) لاکين امپرياليزم و ارتجاع چاليشيرديلار کی، يارانميش بو ايکی دموکراتيک دؤلتی آرادان آپارسينلار. اونلار جنوب خانلارينی موعاصير سيلاحلارلا سيلاحلانديريب آذربايجان و کوردستان اوزه رينه گؤندريرديلر.

بئله بير شراييده دوشمن هوجومونون قارشيسی نی آلماق اوچون هر ايکی حؤکومتين نوماينده لری باشدا سيد جعفر پيشه وری و قاضی محمد اولماقلا کوردستان طرفيندن کوردستان فدائيلری نين باش فرماندهی گئنرال محمدحسين سيف قاضی، عيراق کوردلری نين باشچيسی موللا موصطفی بارزانی و باشقا طايفا باشچيلاری آذربايجان ميللی حؤکومتی فدائی باشچيلاری نين اشتراکی ايله ١٩٤۶- جی ايل اوکتيابر آيینين آخيرلاريندا ماراغا شهرینين ياخينليغيندا خوجامير قصبه سينده حربی موشاويره کئچيرميشلر. موشاويره ايران دؤلتی و مورتجعلرين آرتماقدا اولان سيلاحلی هوجوم تهلوکه سينين قارشيسينی آلماق اوچون واحيد فرمانده ليين ياراديلماسينی موذاکيره ائده رک آشاغيداکی قرارلاری قبول ائتميشدير:

١- مرکز تبريز اولماقلا آذربايجان و کوردستان سيلاحلی فدائی دسته لرينين واحيد فراماندهليی ياراديلسين.

۲- آذربايجان فدائيلری کوردستانين ساغقيز جبهه سينه کوردستان فدائيلری ايسه افشار، تيکانتپه و سايره جبهه لرينه گؤندريلسينلر.

۳- ساغقيز، سردشت، هولاسو، افشار جبهه لرينده آذربايجان فدائيلرينه باش فرمانده گنئرال عظيمی و کوردستان فدائيلرينه ايسه موللا موصطفی بارزانی باشچيليق ائتسينلر.

٤- افشار و تيکانتپه جبهه سينده ووروشان کورد فدائيلری نين باش فرمانده ليی محمدحسين خان سيف قاضييه تاپشيريلميشدير.

۵- سيد جعفر پيشه وری و سيف قاضی بوتون سيلاحلی قووه لره باش فرمانده تعيين ائديلميشلر.

۶- کوردستان سيلاحلی قووه لرينه لازيم اولان هر جور کؤمه يی آذربايجان ميللی حؤکومتی عؤهده سينه گؤتورموشدور.

هم آذربايجان و همده کورد خالقلاری بو مهربان اتفاقی سئوينجله قارشيلاييب دئييرديلر کی، پيشه وری و محمد قاضی ايکی قارداشديرلار.

هر ايکی خالقين منافع، آزادليغی اوغروندا آذربايجان و کورد فدائيلری بير سنگرده مردليکله ووروشاراق بؤيوک قوربانلار وئرديلر. کورد فدائيلری سيف قاضی، احمد فارووق و يوزلرله بئله ايگيد اوغوللار قوربان وئرديی کيمی آذربايجان خالقی دا واحيد جبهه ده گئنرال عظيمی، مايور رامتين، سلطان آزاد و يوزلرله ايگيد اوغوللارينی قوربان وئرميشدير.

حاضيرکی زاماندا آذربايجان و کورد خالقلاری آراسيندا زده لنمه ين دوستلوق، هم رأی ليک و مهربان قونشولوق تاثيری آلتيندا واحيد منافع اوغروندا آپاريلان موباريزه لرده پولاد بيرليی لازيمدير. قوی آذربايجان و کورد خالقلاری هميشه دئسينلر کی، عشق اولسون بو بيرلييه!

لطفعلی اردبيلی (فلکی)