کوردوستان - آذربايجان حؤکومتلري دوستلوق و همکارليق قراردادي
کوردوستان ميللی حؤکومتی ايله آذربايجان ميللی حؤکومتی آراسيندا باغلانميش دوستلوق و صميمی همکارليق قراردادينين متنی
ماده ۱- لازم گوروندويو محللرده هر ايکی ملی حکومت آراسيندا نماينده مبادله سی اولسون٠
ماده ۲- آذربايجاندا اهاليسينين معين بير قسمی کوردلر اولان يئرلرده، دولتی اداره ايشلرينده کوردلردن، و کوردستاندا اهاليسينين معين قسمی آذربايجانليلار اولان يئرلرده، دولتی اداره ايشلرينده آذربايجانليلاردان دا اولاجاقدير٠
ماده ۳- هر ايکی ملتين مشترک اقتصادی موضوعلارينی حل ائتمک اوچون بير مختلط اقتصادی کوميسييون تشکيل وئرمک و بو کوميسييونون قرارلاری هر ايکی ملی حکومتين باشچيلارينين سعی ايله حياتا کئچيريلمه ليدير٠
ماده ٤- آذربايجان و کوردستان ملی حکومتلری آراسيندا نظامی همکارليق ياراتماق، ايجاب ائدن وقتلرده هر ايکی حکومتين نظامی قوه لری بير - بيرلرينه لازمی کمک ليق ائتمه ليديرلر٠
ماده ۵- تهران حکومتی ايله بير مذاکره لازم گليرسه، آذربايجان و کوردستان ملی حکومتلرينين هر ايکيسينين موافق نظری ايله عمله گلمه ليدير٠
ماده ۶- آذربايجان ملی حکومتی، آذربايجاندا ياشايان کوردلرين ملی ديل و مدنيتينين ترقی لری اوچون لازم گلن شرايطی، ممکن اولدوغو قدر ياراتماليدير. همچنين کوردستان ملی حکومتی، کوردستاندا ياشايان آذربايجانليلارين ملی ديل و مدنيتينين ترقی لری اوچون لازم گلن شرايطی، ممکن اولدوقجا ياراتماليدير٠
ماده ٧- آذربايجان و کورد خالقلارينين تاريخی دوستلوق و ملی دموکراتليق قارداشليغينی پوزماق و يا لکه دار ائتمه يه چاليشان شخص، هر ايکی طرفين مشترک اقداماتی ايله جزالاناجاقدير٠
قرارداد تبريز شهرينده، آذربايجان ملی مجلسی بيناسيندا ۱۳۲۵- جی ايل، ارديبهشت آينين اوچونده، آذربايجان ملی حکومتينين باشچيسی سيد جعفر پيشه وری و کوردستان ملی حکومتينين باشچيسی قاضی محمد طرفيندن امضالانميشدير٠
قراردادين مذاکره و امضالانما مراسمينده، آذربايجان ملی مجلسينين نماينده لريندن علاوه، آذربايجان و کوردستان دموکرات فرقه لرينين مرکزی کميته عضولری، دولت خادملری و کورد طايفا باشچيلاريندان بير عده سی اشتراک ائتميشلر٠
posted by Mehran Baharlı @ 11:18 AM
0 comments
0 Comments:
Post a Comment
<< Home